بھارت میں سیما حیدر کی بیٹی کی پیدائش پر سابق شوہر کا بیان سامنے آگیا

پاکستان سے محبت کے لیے بھارت جانے والی سیما حیدر بیٹی کی پیدائش سے ایک بار پھر خبروں کی زینت بنی ہوئیں ہیں۔

تفصیلات کے مطابق سیما حیدر نے 18 مارچ کو بھارت کے شہر نوئیڈا کے کرشنا اسپتال میں بیٹی کو جنم دیا، جو ان کے بھارتی شوہر سچن مینا کے ساتھ ان کی پہلی اولاد ہے۔ تاہم، اس خوشی کے موقع پر سیما کے سابق شوہر غلام حیدر کا شدید ردعمل سامنے آیا ہے۔  

غلام حیدر نے نومولود بچی کو 'ناجائز' قرار دیتے ہوئے بھارتی حکومت سے اپنے چار بچوں کی حوالگی کا مطالبہ کیا ہے۔ ان کا کہنا ہے کہ سیما نے ان سے باقاعدہ طلاق نہیں لی، اور اس کی بھارت میں نئی شادی غیر قانونی ہے۔

ان کے مطابق، اس شادی کی کوئی قانونی حیثیت نہیں، اور نومولود بچی بھی غیر قانونی رشتے کی پیداوار ہے۔  

دوسری طرف، سچن مینا اور ان کے اہل خانہ نے غلام حیدر کے الزامات کو مسترد کر دیا ہے۔ ان کا کہنا ہے کہ سیما نے اپنی مرضی سے بھارت آ کر شادی کی ہے، اور اب وہ ایک خوشگوار زندگی گزار رہے ہیں۔

ان کے وکیل اے پی سنگھ نے کہا کہ غلام حیدر کے الزامات بے بنیاد ہیں، اور سیما کی شادی مکمل طور پر قانونی ہے۔   یہ معاملہ اب صرف ایک ذاتی جھگڑا نہیں رہا، بلکہ ایک بین الاقوامی مسئلہ بنتا جا رہا ہے۔

قانونی ماہرین کے مطابق، اگر غلام حیدر ثابت کر دیتے ہیں کہ سیما نے بغیر طلاق کے شادی کی ہے، تو بھارتی حکومت ان کے بچوں کی حوالگی کے لیے دباؤ میں آ سکتی ہے۔ تاہم، اگر سیما بھارتی شہری بن چکی ہیں، تو ان کے بچوں کو واپس بھیجنا مشکل ہو سکتا ہے۔