چھتے سے شہد نکالنے پر ظالم وڈیرے نے بچے کی ٹانگ توڑ دی

سندھ کے شہر خیرپور میں درخت سے شہد اتارنے پر وڈیرے نے ظلم کی انتہاء کرتے ہوئے نوجوان کی ٹانگ توڑ دی۔

رپورٹس کے مطابق خیرپور کے علاقے ٹھری میرواہ ہنڈیاری کے علاقے میں وڈیرے نے اپنی لگائی اور نوجوان کو تشدد کا نشانہ بنانے کے بعد اس کی ٹانگ توڑ دی۔

بااثر شخص نے اپنے غنڈوں سے نوجوان محمد یاسین میرانی کو درخت سے شہد اتارنے پر بدترین تشدد کیا جس کے باعث وہ اپنی ٹانگ سے محروم ہوگیا۔

انصاف کے لیے نوجوان کے ورثا نے احتجاج کیا اور پولیس سے اپیل کی ہے کہ بااثر وڈیرے کے خلاف واقعے کا مقدمہ درج کرے، مگر پولیس کی جانب سے تاحال کوئی ایکشن نہیں لیا گیا۔

واضح رہے کہ اس سے قبل سندھ میں انسان تو دور کی بات بے زبان جانور پر بھی تشدد کیا جاچکا ہے۔

رواں سال جون میں سندھ کے علاقے سانگھڑ میں بااثر افراد نے اونٹ کی ٹانگ کاٹ دی لیکن پولیس نے سب کچھ جانتے ہوئے بھی بااثر وڈیرے کے خلاف مقدمہ درج کرنے کے بجائے نامعلوم افراد کے خلاف مقدمہ درج کرلیا تھا۔