حماس کی دنیا بھر میں اپنے حامیوں سے ہتھیار اُٹھانے کی اپیل

حماس نے امریکی صدر ڈونلڈ ٹرمپ کے غزہ سے فلسطینیوں کی بے دخلی منصوبے کے خلاف دنیا بھر میں اپنے حامیوں سے ہتھیار اٹھانے کی اپیل کی ہے۔

عرب میڈیا کا اس حوالے سے کہنا ہے کہ سینئر حماس عہدیدار سامی ابو زہری نے کہا ہے کہ جو کوئی بھی ہتھیار اٹھاسکتا ہو، اسے عملی اقدام کرنا چاہیے، دھماکہ خیز مواد، گولی، چاقو یا پتھر کچھ بھی نہ چھوڑیں، ہر کوئی اپنی خاموشی توڑ دے۔

سامی ابو زہری کے مطابق اس شیطانی منصوبے کے خلاف اٹھ کھڑے ہوں جو قتل عام  اور بھوک کے ساتھ منسلک ہے۔

واضح رہے کہ  غزہ کے تباہ حال علاقے کے باشندوں کو پڑوسی ممالک مصر اور اردن منتقل کرنے کا خیال سب سے پہلے امریکی صدر ڈونلڈ ٹرمپ نے پیش کیا تھا۔ اسرائیلی وزیر اعظم نیتن یاہو نے بھی گزشتہ روز اس منصوبے پر عمل کرنے کا کہا ہے ۔

دوسری جانب اسرائیلی فوج نے رفح کو خالی کرنے کا حکم دے دیا ہے۔