اسلامی نظریاتی کونسل کا ایک ساتھ 3 طلاقوں پر سزا دینے کا مطالبہ

اسلامی نظریاتی کونسل کے چیئرمین مفتی راغب نعیمی نے کہا ہے کہ تین طلاقیں ایک ساتھ دینے کے عمل پر سزا دی جائے تو ملک میں طلاقوں کی شرح کم ہوجائے گی۔

چیئرمین نظریاتی کونسل نے اسلام آباد میں میڈیا سے گفتگو کرتے ہوئے کہا کہ مرد کا دوسرا نکاح ثالثی کونسل سے اجازت کے بغیر کئے جا نے پرسزا غیر شرعی ہے، عدالتی نظام اور نظام انصاف معتبر اور بااثر ہو نا چاہیے۔

انہوں نے کہا کہ نکاح ، طلاق ، خلع اور تنسیخ نکاح کے عدالتی فیصلے شریعت کے مطابق ہو نے چاہیں۔ مفتی راغب نعیمی نے کہا کہ تین طلاقیں اکٹھی دینے پر سزادی جائے توطلاقوں کی شرح کم ہوجائے گی، ملکی قانون کو شریعت کے مطابق تشکیل دیا جائے۔

راغب نعیمی نے کہا کہ قرآنی حکم کہ مابین ازواج انصاف کیئے جانے کی تفصیلات متعین کی جا سکتی ہیں، یہ تاثر زائل ہونا چاہیے کہ تیز تر انصاف صرف سیاستدان اور امیرکو ہی ملتا ہے، ججز خوف خدا کو سامنے رکھ کراپنے فیصلوں میں میرٹ کا خیال رکھنا فرمان الہٰی کے مطابق اور اعلیٰ مقام کا تقٰوی ہے۔