میں 27 رمضان کا روزہ لازمی رکھتا ہوں، اُس روز دعا قبول اور مرادیں پوری ہوتی ہیں، شیو ٹھاکرے

بھارت کے مقبول ترین ریئلٹی شو بگ باس سیزن 16 سے شہرت پانے والے ہندو نوجوان شیو ٹھاکرے نے انکشاف کیا ہے کہ انہوں نے 27ویں رمضان کو روزہ رکھا تھا۔

شیو ٹھاکرے نے ایک صحافی کے سوال کے جواب میں کہا کہ ’میں اور ہمارے گروپ کے دیگر لڑکوں نے ایک مسلمان دوست کے ساتھ مل کر روزہ رکھا‘۔

انہوں نے بتایا کہ ’میرا ایک مسلمان دوست ہے جس کے گھر ہم سب رمضان میں جاتے ہیں اور پھر سحری تک جاگتے ہیں جہاں اُس کی والدہ ہم سب کو ایک ساتھ بیٹھا کر سحری دیتی ہیں‘۔

شیو نے کہا کہ دوست کی والدہ بالکل مجھے اپنی سگی ماں کی طرح عزیز ہیں اور وہ ویسے ہی خیال بھی رکھتی ہیں، جس پر مجھے بہت خوشی ہوتی ہے۔

اُنہوں نے کہا کہ میں اپنے مسلمان دوستوں کے ساتھ رمضان کا 27واں روزہ لازمی رکھتا ہوں کیونکہ مسلمان کہتے ہیں کہ یہ بڑی رات ہوتی ہے، اس روزے کی رات کو سچے دل سے مانگی گئی ہر دلی مراد لازمی پوری ہوتی ہے۔

شیو ٹھاکرے نے مزید کہا کہ مجھے رمضان کے بعد سب سے زیادہ انتظار عید پر بننے والے شیر خورمے کا ہوتا ہے اور میں اسے کھانے کے لیے ہر وقت تیار رہتا ہوں۔