سدھو موسے والا کے 60 سالہ والدین کے ہاں جلد اولاد کی آمد متوقع

سدھو موسے والا کے 60 سالہ والدین کے ہاں ننھے مہمان کی آمد متوقع ایک پرتشدد کاروائی میں قتل کیے جانے والے بھارتی پنجابی گلوکار اور والدین کی اکلوتی اولاد سدھو موسے والا کے ماں باپ کی گود ہری ہونے والی ہے۔

بھارتی میڈیا کے مطابق سدھو موسے والا کی والدہ کی عمر 58 جبکہ والد کی عمر 60 برس ہے، اولاد کی آمد کے سلسلے کو چھ ماہ گزر چکے ہیں۔

دونوں ایک بار پھر والدین بننے کیلیے پرجوش اور انتہائی خوش ہیں کیونکہ سدھو موسے والا کی اندوہناک موت کے بعد ان سے اولاد کا واحد سہارا بھی چھن گیا تھا۔

سدھو موسے والا کے خاندان کے کچھ افراد نے بھارتی میڈیا کو بتایا کہ گلوکار کی 58 سالہ والدہ چرن کور اگلے ماہ ایک بچے کو جنم دیں گی اور اس وقت وہ 6 ماہ سے نامعلوم مقام پر ہیں۔

خیال ظاہر کیا جا رہا ہے کہ جوڑے نے بچے کی پیدائش کے لیے طریقہ علاج ’’آئی وی ایف‘‘ کا انتخاب کیا ہے۔

واضح رہے کہ سدھو موسے والا کو دو سال قبل گینگسٹرز نے گاڑی پر فائرنگ کرکے قتل کیا تھا۔ گلوکار کو 30 گولیاں لگی تھیں۔