سیف علی خان پر حملہ، اروشی روٹیلا نے معذرت کیوں کی؟

نئی دہلی: بالی ووڈ اداکارہ اروشی روٹیلا کو سیف علی خان پر حملے سے متعلق سوال نظر انداز کرنے کا احساس ہو گیا۔

بھارتی میڈیا کے مطابق اروشی روٹیلا نے سیف علی خان پر ہونے والے حملے سے متعلق سوال پر اپنی قیمتی گھڑی کی تعریف کرنا شروع کر دی تھی جس پر انہیں شدید تنقید کا سامنا کرنا پڑا۔

اداکارہ نے سیف علی خان کیلئے ہمدردی کا اظہار کرتے ہوئے اپنی نئی فلم ڈاکو مہاراج کی کامیابی اور قیمتی تحائف کا ذکر کیا جس پر صارفین کی جانب سے انہیں خود پسند قرار دیا جا رہا تھا۔

سوشل میڈیا پر بے تحاشہ تنقید کے بعد اب اروشی روٹیلا نے بیان جاری کیا ہے جس میں انہوں نے معذرت کی ہے۔

اپنے بیان میں اداکارہ نے کہا کہ میں یہ پیغام گہری ندامت اور دلی معذرت کے ساتھ لکھ رہی ہوں، آپ کو جس صورتحال کا سامنا ہے میں اس کی شدت سے بالکل بے خبر تھی۔

اروشی روٹیلا نے سیف علی خان کیلئے پیغام لکھا کہ میری معذرت قبول کریں، میں آپ کے ساتھ پیش آئے واقعے کو جان گئی ہوں اور آپ کیلئے نیک خواہشات کا اظہار کرتی ہوں۔