عمران خان نے فوج اور کسی ادارے کیخلاف بات نہیں کی، علی محمد خان

رکن قومی اسمبلی علی محمد خان نے ڈسٹرکٹ اینڈ سیشن کورٹ اسلام آباد میں گفتگو کرتے ہوئے کہا ہے کہ بانی پی ٹی آئی نے سیاسی بات کی ہے کسی ادارے یا اپنی فوج کے خلاف بات نہیں کی۔ 

علی محمد خان کا کہنا تھا کہ بانی پی ٹی آئی نے سیاسی طرز پر کہا کہ جمہوریت میں عوامی مینڈیٹ کو عزت دیں، جس کو ووٹ پڑا ہے اس کو حکومت بنانے دیں جیسے ماضی میں شیخ مجیب کو ووٹ پڑا تھا تو اس کو عوام نے ووٹ دیا تھا جنرل یحیی کچھ اور بات کر رہا تھا اور بھٹو نے نعرہ لگایا کہ ادھر ہم ادھر تم اور نتیجہ کیا نکلا۔

علی محمد خان نے کہا کہ ہماری بات اب بھی سیاسی یے کہ جس کو ووٹ پڑا اس کو حکومت بنانے دیں عوام نے مینڈیٹ بانی پی ٹی آئی کو دیا تھا فارم 47 پہ جب آپ لوگوں کو لے کر آتے ہیں تو عوام ایک طرف کھڑی ہے اور حکومت ایک طرف ہے۔ 

بانی پی ٹی آئی نے حمود رحمان رپورٹ پڑھنے کا صرف اس لیے کہا کہ پتہ لگے کیوں مینڈیٹ پر ڈاکے پڑتے ہیں اس ملک میں کوئی غدار نہیں ہے، سیاسی نقطہ نظر کے حوالے سے اختلاف ہے۔