بجلی کی فی یونٹ قیمت میں 8 روپے تک کمی کا اعلان متوقع

وزیراعظم شہباز شریف آئی ایم ایف سے مذاکرات کے بعد بجلی کی قیمت میں کمی کا اعلان کریں گے اور 8 روپے فی یونٹ تک عوام کو ریلیف ملنے کا امکان ہے۔

وزارت خزانہ کے ذرائع نے بتایا کہ 8 روپے کے علاوہ پاور ڈویژن نے مزید دو روپے فی یونٹ کمی کیلیے مختلف اقدامات پر غور کردیا ہے جن پر آئی ایم یاف کو اعتماد میں لیا جائے گا۔

ذرائع کے مطابق وزیراعظم یوم پاکستان پر قوم سے خطاب کرتے ہوئے بجلی کی قیمت میں کمی کا اعلان کریں گے جبکہ اُس سے قبل تمام چیزوں کو حتمی شکل دی جائے گی۔

ذرائع کے مطابق یہ کمی یکم اپریل 2025سے نافذ ہوگی اور صارفین کو مئی سے کم بل دیکھنے موصول ہونگے۔ ذرائع کے حوالے سے بتایا گیا ہے کہ 8 روپے فی یونٹ کی مجموعی کمی میں سے 4.73 روپے فی یونٹ مستقل ایڈجسٹمنٹ ہوگی یہ تبدیلی چھ آئی پی پیز (آئی پی پیز) کے ساتھ معاہدوں کی منسوخی، سولہ آئی پی پیز کے ساتھ پاور خریداری معاہدوں میں نظرثانی کرکے ’ٹیک اینڈ پے۔

ماڈل میں تبدیل کرنے، بیگاس پاور پلانٹس کو امریکی ڈالر سے پاکستانی روپے میں منتقل کرنے اور حکومتی پاور پلانٹس (جی پی پیز) کیلئے رٹارن آن ایکویٹی (آر او ای) کو 13 فیصد تک کم کرنے کے نتیجے میں آئی ہے جس میں امریکی ڈالر کو 168 روپے پر فکس کیا گیا ہے۔

حکام نے یہ بھی بتایا کہ ٹیرف میں کمی کا حساب ان تیل کی مصنوعات کی قیمتوں کے اثرات کو مدنظر رکھتے ہوئے کیا جائے گا جنہیں بین الاقوامی مارکیٹ میں 16 مارچ 2025 سے کم کیا گیا تھا موجودہ تیل کی قیمتوں کو برقرار رکھنے کا سے مجموعی طور پر 168 ارب روپے کا مالی کشن حاصل ہوسکے گا جس سے فی یونٹ بجلی کی قیمت میں 1.30 روپے کی کمی میں مدد ملے گی۔