ذاکر نائیک گورنر ہاؤس سندھ کراچی میں آج لیکچر دیں گے، شرکت کا طریقہ کار جانیے

گورنر ہاؤس میں ڈاکٹر ذاکر نائیک شام7 بجے لیکچر دیں گے، جس میں مخصوص افراد کو شرکت کی اجازت ہوگی۔

تفصیلات کے مطابق معروف مبلغ ڈاکٹر ذاکر نائیک پہنچ گئے جس کے بعد اُن کی گورنر سندھ کامران ٹیسوری سے گورنر ہاؤس میں ملاقات ہوئی۔

سیکیورٹی خدشات کے پیش نظر ڈاکٹر ذاکر نائیک کا چار اور پانچ اکتوبر کا جناح گراؤنڈ میں ہونے والا عوامی جلسہ مؤخر کردیا گیا ہے جبکہ وہ پانچ اکتوبر کو بحریہ آڈوٹیوریم میں عوام سے گفتگو کریں گے۔

گورنر سندھ کامران ٹیسوری نے بتایا کہ آج شام 7 ڈاکٹر ذاکر نائیک گورنر ہاؤس میں لیکچر دیں گے،  پروگرام میں شرکت دعوت نامہ اور شناختی کارڈ سے مشروط ہوگی۔  انہوں نے بتایا کہ  سیکیورٹی مسائل کے باعث دعوت نامہ جاری کئے گئے۔

گورنر سند ھ نے کہا کہ  آئی ٹی کے طلباء شرکت کرنا چاہیں تو وہ اپنا دعوت نامہ گورنر ہاؤس سے حاصل کر سکتے ہیں،  شرکت کرنے والے افراد اپنے ہمراہ دعوت نامہ اور شناختی کارڈ ضرور ساتھ لائیں۔