لیاری گینگ وار کے سرغنہ عذیر بلوچ کا بھائی گرفتار

شہر قائد میں قانون نافذ کرنے والے ادارے نے پولیس کے ساتھ مشترکہ کارروائی میں لیاری گینگ وار کے سرغنہ عذیر بلوچ کے بھائی کو گرفتار کرلیا۔

تفصیلات کے مطابق رینجرز اور پولیس نے لیاری میں چھاپہ مار کارروائی کے دوران لیاری گینگ وار کے سرغنہ عذیر جان بلوچ کے بھائی زبیر کو گرفتار کر کے ایس ایم جی اور دستی بم برآمد کرلیا۔

ایس ایچ او چاکیواڑہ ساجد دھاریجو نے بتایا کہ ’پولیس نے رینجرز کی مدد سے ملزم زبیر کو لیاری کے علاقے سنگولین سے گرفتار کیا، ملزم حال ہی میں جیل سے رہا ہوا تھا جو بھتہ خوری کا نیٹ ورک فعال کر رہا تھا‘۔

انہوں نے بتایا کہ ملزم جیل میں بیٹھ کر بھی گینگ وار کے بھتے کا نیٹ ورک چلا رہا تھا۔ انھوں نے بتایا کہ پولیس نے ملزم کی نشاندہی پر ایک گودام پر چھاپہ مار کر ایس ایم جی اور دستی بم برآمد کرلیا۔

پولیس نے ملزم کے خلاف انسداد دہشت گردی کی دفعہ سمیت دیگر دفعات کے تحت 2 مقدمات درج  کرلیے ہیں۔