بدبخت بیٹے نے پاؤں نہ دبانے اور مالش نہ کرنے پر باپ کو مار ڈالا

بھارتی ریاست مہارشٹرا میں 33 سالہ بدبخت بیٹے نے پیروں کی مالش سے انکار پر 62 سالہ والد کو تشدد کر کے مار ڈالا۔

بھارتی ریاست مہارشٹرا کے علاقے ناگپور میں 62 سالہ شخص کو لاتوں اور گھونسوں سے تشدد کر کے بدبخت بیٹے نے قتل کیا۔ ملزم کی شناخت کشال عرف انگا کے نام سے ہوئی جسے پولیس نے گرفتار کرلیا اور یہ عادی مجرم بتایا جارہا ہے۔

پولیس کے مطابق کشال نے رات کو گھر آکر اپنے والد سے پیر دبانے اور مالش کرنے کی فرمائش کی والد کے انکار پر وہ طیش میں آیا اور بے دردی سے مار پیٹ شروع کردی۔

بزرگ کے چیخنے کی آواز پر پڑوسی جب گھر پہنچے تو وہ بے ہوش ہوئے تھے جبکہ وہاں پہنچنے والے دوسرے بیٹے پر بھی ملزم نے حملہ کر کے اُسے تشدد کا نشانہ بنایا۔

اسپتال منتقل کرنے پر ڈاکٹرز نے موت کی تصدیق کی اور بتایا کہ سینے پر لگنے والے گھونسے حرکتِ قلب بند ہونے کا سبب بنی ہے۔ پولیس نے ملزم کو عدالت میں پیش کرکے جسمانی ریمانڈ حاصل کرلیا۔