کراچی: 23 سالہ لاپتہ نوجوان کی تشدد زدہ لاش برآمد

شہر قائد کے علاقے منگھوپیر سے ہاتھ اور آنکھوں پر پٹی بندی دو لاشیں برآمد ہوئیں جن میں سے ایک کی شناخت لاپتہ نوجوان کے طور پر ہوئی ہے۔

پولیس کے مطابق ایک لاش کی شناخت 23 سالہ شاہ زمان کے نام سے ہوئی جو مسنگ پرسنز میں شامل تھا۔

یہ تشدد زدہ لاشیں منگھوپیرتھانے کی حدود ناردرن بائی پاس زریاب ہوٹل کے قریب سے ملیں، جنہیں نامعلوم ملزمان نے فائرنگ کرکے قتل کیا ہے۔ واقعے کی اطلاع ملنےپرپولیس حکام موقع پرپہنچ گئے اورفوری طورپر جائے وقوع سے شواہد اکٹھا کرنے کے لیے کرائم سین یونٹ کو موقع پرطلب کیا۔

پولیس کو لاشوں کے قریب سے نائن ایم ایم پستول کا ایک خول ملا ہے، جبکہ ایک مقتول کی جیب میں شناختی کارڈ بھی تھا، جس پر نام شاہ زمان درج تھا۔ پولیس نے دوسری لاش کی شناخت کیلیے بائیو میٹرک ڈیوائس سے مدد حاصل کرلی ہے۔

پولیس کے مطابق مقتول شاہ زمان 17 اگست 2023 کو لیاری کے علاقے چاکیواڑہ سے لاپتہ ہوا جس کا مقدمہ بھی درج ہے۔