لاہور میں رشتے کے تنازع پر چچا زاد بھائی نے 3 بچوں کی ماں کو قتل کردیا

پنجاب کے دارالحکومت کے علاقے میں چچا زاد بھائی نے رشتے کے تنازع پر تین بچوں کی ماں کو قتل کردیا۔

تفصیلات کے مطابق لاہور کے علاقے لیاقت آباد میں رشتہ لے کر آنے والی خاتون کو اصرار کرنے پر اُس کے چچا زاد کزن نے سینے پر گولی مار کر قتل کردیا۔

ایس پی ماڈل ٹاؤن اخلاق احمد نے بتایا کہ مقتولہ کی شناخت 36 سالہ کرن شہزادی کے نام سے ہوئی جو تین بچوں کی ماں اور شادی شدہ تھی، مقتولہ اپنے بھائی کیلیے چچا زاد کزن کا رشتہ لے کر آئی تھی۔

انہوں نے بتایا کہ بات چیت کے دوران خاتون نے بھائی سے رشتہ دینے کا اصرار کیا تو ملزم نے طیش میں آکر پستول نکالی اور سینے پر گولی مار دی جبکہ ملزم موقع سے فرار ہوگیا۔

پولیس نے ملزم کی جلد گرفتاری کی یقین دہانی کرائی ہے۔