مدرسے کے طالب علم پر قاری کا بہیمانہ تشدد

پنجاب کے علاقے جڑانوالہ میں مدرسے کے طالب علم کو معلم نے تشدد کا نشانہ بنایا ہے جس پر وزیر اعلیٰ مریم نواز نے نوٹس لے لیا۔

تفصیلات کے مطابق وزیر اعلیٰ پنجاب مریم نوازشریف نے جڑانوالہ میں مدرسہ کے طالبعلم پر قاری کے تشدد کے واقعہ کا نوٹس لیا اور انسپکٹر جنرل (آئی جی) سے رپورٹ طلب کرلی۔

وزیر اعلیٰ مریم نواز شریف کی متاثرہ طالب علم کو بہترین طبی سہولتیں فراہم کرنے کی ہدایت کی اور کہا کہ تحقیقات کرکے تشددکے ذمہ دارکے خلاف قانونی کارروائی عمل میں لائی جائے۔ انہوں نے کہا کہ طالبعلم پر کسی بھی قسم کا تشدد برداشت نہیں کیا جائے گا۔

اُدھر چیئرپرسن چائلڈ پروٹیکشن بیورو اور ممبر صوبائی اسمبلی پنجاب سارہ احمد کا جڑانوالہ میں مدرسے کے طالبعلم پر قاری کے مبینہ تشدد کے واقعہ کا نوٹس لیتے ہوئے چائلڈ پروٹیکشن بیورو فیصل آباد کی ٹیم کو متاثرہ بچے اور لواحقین سے رابطہ کی ہدایت کردی۔

انہوں نے کہا کہ مدرسے کے طالبعلم پر قاری کے مبینہ تشدد کا واقعہ افسوسناک ہے، پولیس کمسن بچے کو تشدد کا نشانہ بنانے والے قاری کے خلاف سخت کارروائی کرے۔ مبینہ تشدد کا شکار بچے اور لواحقین کو ہر ممکن معاونت فراہم کی جائے گی۔