تھکی ہوئی ہوں، تھوڑا صبر کرو: ناشتے میں تاخیر پر بدبخت بیٹے نے ماں کو قتل کردیا

پنجاب کے علاقے گجرات کے ایک نواحی گاؤں میں ایک المناک واقعہ پیش آیا، جہاں بیٹے نے ناشتہ دینے میں تاخیر پر اپنی روزے دار ماں کو قتل کر دیا۔

 تفصیلات کے مطابق یہ واقعہ گجرات کے انڈسٹریل اسٹیٹ 2 پولیس اسٹیشن کے دائرہ اختیار میں واقع مراریاں گاؤں میں پیش آیا۔

عثمان نواز نامی شخص نے اپنی والدہ رضیہ بی بی سے ناشتہ تیار کرنے کو کہا، لیکن ماں نے جواب دیا کہ وہ روزے سے ہیں اور کچھ دیر آرام کرنا چاہتی ہیں، اس لیے وہ تھوڑا صبر کرے۔

 ماں کی جانب سے ناشتہ دینے میں تاخیر پر عثمان نواز غصے میں آ گیا اور اپنی ماں کے سر پر آہنی سلاخ سے حملہ کر دیا، جس کے نتیجے میں روزے دار خاتون موقع پر ہی دم توڑ گئیں۔

واقعے کی اطلاع ملتے ہی پولیس فوراً جائے وقوع پر پہنچی اور ملزم کو گرفتار کر لیا۔ خاتون کی لاش کو پوسٹ مارٹم کے لیے عزیز بھٹی شہید ٹیچنگ ہسپتال منتقل کر دیا گیا۔ 

پولیس نے ملزم کے خلاف اس کے بھائی فرمان علی کی مدعیت میں تعزیرات پاکستان کی دفعہ 302 کے تحت مقدمہ درج کر لیا۔