افغان کھلاڑیوں کی دوران میچ افطار کرنے کی ویڈیو وائرل

افغانستان کرکٹ ٹیم کے کھلاڑی محمد نبی اور حشمت اللہ شاہدی کی میچ کے دوران میدان میں ہی افطار کرنے کی ویڈیو سوشل میڈیا پر گردش کررہی ہے۔ 

آئرلینڈ اورافغانستان کی کرکٹ ٹیموں کے دوران گذشتہ روز شارجہ کرکٹ اسٹیڈیم میں 3 ون ڈے میچز پر مشتمل سیریز کا آخری میچ ہوا۔

آئرلینڈ نے اس میچ میں ٹاس جیت کر پہلے افغانستان کو بیٹنگ کی دعوت دی، تاہم افغانستان کی بیٹنگ کے دوران مغرب کا وقت ہوگیا۔

افغان کھلاڑی محمد نبی اور حشمت اللہ شاہدی نے مغرب کا وقت ہوتے ہی کچھ وقت کے لیے افطاری کیلئے میچ رکوادیا، میدان میں ہی افطاری کی جب کہ دیگر کھلاڑیوں نے ڈریسنگ روم میں روزہ افطار کیا۔ 

افغان کرکٹ بورڈ کے آفیشل اکاؤنٹ سے بھی اس لمحے کی ویڈیو شیئر کی گئی جس میں افغان کھلاڑیوں کو پانی کے ساتھ روزہ کھولنے میں مصروف ہیں۔