بھارت میں فوج نے اپنے ہی شہریوں کو بھون دیا، ہلاکتیں

بھارتی ریاست چھتیس گڑھ میں سیکیورٹی فورسز نے ایک بار پھر قبائلی علاقوں میں ظلم کی نئی داستان رقم کرتے ہوئے 16 معصوم قبائلیوں کو موت کے گھاٹ اتار دیا۔  

تفصیلات کے مطابق یہ ظالمانہ آپریشن شورش زدہ ضلع سکما میں کیا گیا، سینٹرل ریزرو پولیس فورس (CRPF) اور ڈسٹرکٹ ریزرو گارڈ (DRG) نے مشترکہ آپریشن کیا۔

بھارتی فورسز کا دعویٰ ہے کہ مارے گئے افراد "نکسالی" (ماؤ نواز باغی) تھے، مقامی باشندوں کا کہنا ہے کہ یہ معصوم قبائلی تھے جو کسی مسلح تحریک کا حصہ نہیں تھے۔  

آپریشن اور حالات کی وجہ سے علاقے کے داخلی و خارجی راستے بند کر دیے گئے ہیں، مکین گھروں میں محصور ہیں اور خوراک کی شدید قلت کا سامنا ہے۔ طبی امداد تک رسائی نہ ہونے کے باعث صورتحال مزید سنگین ہوتی جا رہی ہے۔ 

یہ پہلا واقعہ نہیں، 20 مارچ کو بھی بیجاپور اور دانتے واڑہ میں 30 قبائلیوں کو ہلاک کیا گیا تھا، بھارتی ریاستی جبر کے خلاف مقامی تحریکوں کو کچلنے کے لیے ایسے آپریشنز معمول بن چکے ہیں۔ وسائل کی غیر منصفانہ تقسیم اور نسلی امتیاز کے خلاف جدوجہد کرنے والوں کو نشانہ بنایا جا رہا ہے۔  

انسانی حقوق کی تنظیموں نے بھارت کے اس اقدام کی شدید مذمت کی  اور کہا ہے کہ "یہ انسانی حقوق کی صریح خلاف ورزی ہے، بین الاقوامی برادری کو بھارت کے اس ظالمانہ رویے پر فوری کارروائی کرنی چاہیے"۔

"مقامی آبادی کے بنیادی حقوق سلب کرنے کی یہ کھلی دہشتگردی ہے"۔