غزہ میں اسرائیلی جارحیت کو ایک سال مکمل ، مزید 21 فلسطینی شہید

غزہ کی سول ڈیفنس ایجنسی کا کہنا ہے کہ مرکزی دیر البلاح میں ایک مسجد پر اسرائیلی فضائی حملے کے نتیجے میں 21افراد شہید ہوگئے۔

خبر رساں ادارے اے ایف پی کے مطابق اسرائیل نے دیر البلاح میں اس مسجد کو نشانہ بنایا جہاں بے گھر افراد پناہ لئے ہوئے تھے۔

واضح رہے کہ غزہ میں اسرائیلی جارحیت کو آج ایک سال مکمل ہوگیا ہے، جس کے باعث دنیا بھر میں ہزاروں مظاہرین نے مارچ کیا ہے۔

واشنگٹن میں وائٹ ہاس کے باہر ایک ہزار سے زائد مظاہرین نے احتجاج کیا اور امریکہ سے مطالبہ کیا کہ وہ اسرائیل کو ہتھیار کی فراہمی اور امداد بند کرے۔

امریکہ کہ علاوہ یورپ، افریقہ اور آسٹریلیا میں بھی ہزاروں کے تعداد میں لوگوں نے فلسطینیوں سے اظہار یکجہتی کے لئے اپنا احتجاج ریکارڈ کرایا۔

پاکستان میں جماعت اسلامی کی جانب سے ایک ملین مارچ کا انعقاد بھی کیا گیا ہے جس کا مقصد غزہ میں اسرائیلی جارحیت کے ایک سال مکمل ہونے پر فلسطینیوں سے اظہار یکجہتی کرنا ہے۔