پاکستان میں ریاست کے علاؤہ کسی کو جہاد کی اجازت نہیں، ڈی جی آئی ایس پی آر

ڈی جی آئی ایس پی آر لیفٹیننٹ جنرل احمد شریف چوہدری نے کہا ہے کہ پاکستان کی ریاست تمام غیر ریاستی عناصر کو بلا تفریق مسترد کرتی ہے اور ملک میں کسی بھی جیش یا مسلح جتھے کے لیے کوئی جگہ نہیں۔

ان کا کہنا تھا کہ جہاد کا اعلان کرنے کا اختیار صرف ریاست کے پاس ہے، کوئی فرد یا گروہ یہ حق استعمال نہیں کرسکتا۔

اپنے بیان میں انہوں نے کہا کہ پاکستان نے دہشتگردی کے خلاف جنگ میں فرنٹ لائن اسٹیٹ کا کردار ادا کیا اور بے شمار قربانیاں دیں۔

ان کا مزید کہنا تھا کہ افغانستان سے امریکی انخلاء کے بعد وہاں چھوڑے گئے ہتھیار دہشتگردی میں استعمال ہو رہے ہیں، جس پر امریکا بھی تشویش ظاہر کرچکا ہے۔

لیفٹیننٹ جنرل احمد شریف نے مزید کہا کہ پاکستان کے برادر ملک چین کے ساتھ تعمیری اور اسٹریٹجک تعلقات قائم ہیں جبکہ معرکہ حق کے دوران امریکی صدر ڈونلڈ ٹرمپ کا قائدانہ کردار ایک اسٹریٹجک لیڈر کے طور پر سامنے آیا۔