بشری بی بی کے بڑھتے کردار اور مرکزی قیادت کی بے بسی پر شوکت یوسف پھٹ پڑے

پاکستان تحریک انصاف کے سینئر رہنما شوکت یوسفزئی نے اسلام آباد احتجاج کے حوالے سے لیڈر شپ پر سوالات اٹھاتے ہوئے مایوسی کا اظہار کیا اور پوچھا ہے کہ مذاکرات کیوں نہیں کیے گئے؟

نجی ٹی وی سے گفتگو میں شوکت یوسفزئی نے کہا کہ ہمیں جو سنگجانی میں جلسے کی پیش کش ہوئی اُسے قبول کیوں نہ کیا گیا اور ڈی چوک جانے کا ہی فیصلہ کیوں ہوا۔

انہوں نے کہا کہ علی امین گنڈاپور اور بشریٰ بی بی مانسہرہ میں ہیں، اس بات کی تحقیقات ہونی چاہیے کہ احتجاج کے لیے ڈی چوک ہی کو کیوں چنا گیا؟۔ تحریک انصاف کی لیڈر شپ نے بہت مایوس کیا، علی امین گنڈاپور کے سوا کوئی رہنما سامنے ہی نہیں آیا، مشاورت اور رابطوں کا فقدان نظر آیا جب کہ حکمت عملی کا فقدان بھی واضح ہے۔

یوسفزئی نے کہا کہ بیرسٹر گوہر  اور سلمان اکرم راجا کہاں تھے؟  اسی طرح شیر افضل مروت بھی غائب نظر آئے۔ پارٹی  لیڈرشپ کے پاس فیصلوں ہی کا اختیار نہیں ہے تو پھر اتنے زیادہ کارکنوں کو لے کر کیوں گئے؟

شوکت یوسف زئی کا گفتگو میں مزید کہنا تھا کہ جب یہ بات پہلے سے پتا تھی کہ حکومت ڈی چوک میں کارروائی کرے گی تو اس بات کی پارٹی میں تحقیقات کی جانی چاہیے کہ احتجاج کے لیے ڈی چوک ہی کو کیوں منتخب کیا گیا؟ سنگجانی پر احتجاج کی پیشکش کیوں قبول نہیں کی گئی؟۔