جوہری تابکاری سے نمٹنے کیلیے تیار ہیں، ایرانی وزیر صحت

ایران کے ڈپٹی وزیر صحت علی جعفریان نے کہا ہے کہ محکمہ صحت اسرائیلی حملوں کے دوران کسی بھی تابکاری سے متعلقہ ہلاکتوں اور نقصانات کے خطرے سے نمٹنے کیلیے بھرپور تیار ہے۔ 

جعفریان نے مقامی میڈیا کو بتایا کہ"اب تک ہمیں اسرائیل کی جانب سے غیر روایتی ہتھیاروں کے استعمال کی کوئی اطلاعات نہیں ملیں۔ اگر جوہری ری ایکٹرز کو نشانہ بنایا جاتا ہے تو ہم کسی بھی جوہری رساؤ سے نمٹنے کے لیے تیار ہیں، تاہم ہمیں امید ہے کہ ایسا نہیں ہوگا۔"

انہوں نے بتایا کہ اب تک تین اسپتال حملوں کی زد میں آچکے ہیں، جن میں کرمانشاہ اسپتال بھی شامل ہے جسے مکمل طور پر خالی کرایا جاچکا ہے۔  

وزیر صحت نے کہا کہ یہ تمام شہری اہداف ہیں،بین الاقوامی تنظیموں، خاص طور پر عالمی ادارہ صحت اور بین الاقوامی ریڈ کراس پر زور دیا کہ وہ اسرائیل پر شہری بنیادی ڈھانچے پر حملے روکنے کے لیے دباؤ ڈالیں۔  

تاہم، انہوں نے کہا کہ "ہم ان سے زیادہ توقعات نہیں رکھتے، کیونکہ ہم نے گزشتہ ڈیڑھ سال سے غزہ میں ان کی بے عملی دیکھی ہے۔"