ایران نے جنگ بندی اور مذاکرات کیلیے شرط رکھ دی

جنیوا: ایران نے واضح کر دیا ہے کہ وہ اسرائیل کے حملے بند ہونے تک جوہری مذاکرات میں حصہ نہیں لے گا۔ یہ اعلان جرمنی، فرانس اور برطانیہ کے وزرائے خارجہ کے ساتھ جنیوا میں ہونے والے مذاکرات کے بعد کیا گیا۔  

ایرانی وزیر خارجہ عباس عراقچی نے میڈیا سے بات کرتے ہوئے کہا کہ "آج یورپی رہنماؤں کے ساتھ سنجیدہ اور باوقار مذاکرات ہوئے۔ ہم بات چیت کے تسلسل کی حمایت کرتے ہیں اور مستقبل میں مزید ملاقاتوں کے لیے تیار ہیں۔"  

انہوں نے زور دے کر کہا کہ "ایران ایک بار پھر سفارت کاری پر غور کرنے کو تیار ہے، لیکن ہماری دفاعی صلاحیتوں پر کوئی بحث نہیں ہوگی۔ اسرائیل کو ایران کے شہریوں پر حملے فوری طور پر روکنے چاہئیں۔ جب تک یہ حملے جاری رہیں گے، جوہری مذاکرات ممکن نہیں ہوں گے۔"  

برطانوی وزیر خارجہ نے میڈیا کو بتایا کہ "ہم ایران پر زور دیتے ہیں کہ وہ امریکہ کے ساتھ بات چیت جاری رکھے"، جبکہ فرانسیسی وزیر خارجہ نے کہا کہ "ہمیں امید ہے کہ یہ سفارتی کوششیں مذاکرات کی راہ ہموار کریں گی۔"  

یاد رہے کہ ایران نے گزشتہ ہفتے مسقط میں ہونے والے جوہری مذاکرات کے چھٹے دور میں شرکت سے انکار کر دیا تھا، جس کے بعد یورپی ممالک نے براہ راست مذاکرات کی کوشش شروع کی تھی۔