پاکستان کا عالمی ایٹمی ایجنسی 5 سالہ معاہدہ طے

پاکستان اور بین الاقوامی ایٹمی توانائی ایجنسی (IAEA) کے درمیان کنٹری پروگرام فریم ورک (CPF) پر دستخط کیے گئے ہیں، جو 2026 سے 2031 تک نافذ العمل رہے گا۔

اس معاہدے پر پاکستان اٹامک انرجی کمیشن کے چیئرمین ڈاکٹر راجہ علی رضا انور نے دستخط کیے جبکہ آئی اے ای اے کی جانب سے ڈپٹی ڈائریکٹر جنرل اور سربراہ محکمہ برائے تکنیکی تعاون نے دستخط کیے۔

فریم ورک کے مطابق، پاکستان اور ایجنسی آئندہ پانچ برسوں کے دوران خوراک و زراعت، انسانی صحت و غذائیت، ماحولیاتی تبدیلی اور آبی وسائل کا انتظام، ایٹمی توانائی، اور تابکاری و جوہری تحفظ جیسے اہم شعبوں میں باہمی تعاون کو فروغ دیں گے۔

ڈاکٹر راجہ علی رضا انور کا کہنا تھا کہ یہ معاہدہ پاکستان کے پرامن ایٹمی پروگرام اور جدید سائنس و ٹیکنالوجی کے استعمال کے عزم کی تجدید ہے۔ ان کا کہنا تھا کہ آئی اے ای اے کے تعاون سے پاکستان خوراک، توانائی، صحت اور ماحولیات کے شعبوں میں جدید ٹیکنالوجی کو بروئے کار لا رہا ہے تاکہ سماجی و معاشی ترقی کو یقینی بنایا جا سکے۔

یہ پاکستان اور آئی اے ای اے کے درمیان طے پانے والا پانچواں فریم ورک پروگرام ہے، جو نہ صرف جوہری ٹیکنالوجی کے پائیدار استعمال کو آگے بڑھائے گا بلکہ ملک کی ترقی اور عوامی فلاح و بہبود میں بھی معاون ثابت ہوگا۔