پاکستان کا افغانستان پر فضائی حملہ، متعدد ہلاکتیں رپورٹ

غیر ملکی میڈیا اور افغان حکام نے دعویٰ کیا ہے کہ پاکستان نے سرحد پار کارروائی کی جس میں جانی نقصان ہوا ہے۔

افغانستان نے پاکستان پر مشرقی سرحدی علاقے پکتیا میں بمباری کا الزام عائد کیا ہے تاہم پاکستان کی جانب سے اس بارے میں باضابطہ طور پر کوئی بیان جاری نہیں کیا گیا۔

افغانستان کی وزارت دفاع نے مبینہ بمباری کے ردعمل میں رات گئے جاری ایک مختصر بیان میں براہ راست پاکستان فوج پر منگل کی شام کو صوبہ پکتیا کے ضلع برمل کے مضافات میں بمباری کا الزام عائد کیا ہے۔

بیان کے مطابق: ’اس بمباری میں عام لوگ جن میں زیادہ تر وزیرستان سے آئے ہوئے مہاجر (پناہ گزین) نشانہ بنائے گئے ہیں۔ بمباری میں بچوں سمیت شہری مارے گئے جبکہ کئی زخمی ہوئے ہیں۔‘

غیر ملکی خبررساں ادارے کے مطابق پاکستان نے انتہا پسندوں کے ٹھکانے کو نشانہ بنایا ہے۔