کراچی میں گٹر سے ملنے والی لاشوں کی شناخت ہوگئی

کراچی کے علاقے مائی کلاچی روڈ پر خالی مین ہول سے ملنے والی چار لاشوں کی شناخت کر لی گئی ہے۔

پولیس کے مطابق جاں بحق ہونے والوں میں ایک خاتون اور اس کے تین بچے شامل ہیں۔

پولیس کا کہنا ہے کہ مقتولہ خاتون کھارادر کی رہائشی تھی، جبکہ اس کے شوہر کی تلاش جاری ہے۔

لاشوں کی شناخت خاتون کی بہن نے کی، جس نے پولیس کو اہلِ خانہ سے متعلق تفصیلات فراہم کیں۔

شناخت ہونے والوں میں 35 سالہ انیلہ، 13 سالہ کشور، 13 سالہ حسین اور 10 سالہ کونین علی شامل ہیں۔ پولیس کے مطابق واقعے کا مقدمہ تھانہ ڈاکس میں سرکاری مدعیت میں درج کر لیا گیا ہے۔

کیماڑی پولیس کا کہنا ہے کہ واقعے کی وجوہات جاننے کے لیے مختلف پہلوؤں سے تحقیقات جاری ہیں، جبکہ ملزمان تک پہنچنے کے لیے شواہد اکٹھے کیے جا رہے ہیں۔

ذرائع کے مطابق انیلہ نامی خاتون طلاق یافتہ تھی اور اپنے شوہر سے علیحدہ رہ رہی تھی۔