سانحہ ڈیگاری، سردار کے مزید جسمانی ریمانڈ کی استدعا عدالت نے مسترد کردی

کوئٹہ: ڈیگاری کے علاقے میں ایک مرد اور خاتون کے قتل کے مقدمے میں انسداد دہشت گردی کی عدالت (اے ٹی سی) نے ملزم سردار شیرباز ساتکزئی کے مزید جسمانی ریمانڈ کی پولیس کی استدعا مسترد کر دی ہے۔

عدالت نے سپریم کورٹ کے فیصلے کا حوالہ دیتے ہوئے مقدمے سے دہشت گردی کی دفعات ختم کرنے کا حکم بھی دیا۔ ملزم کے وکیل کا موقف تھا کہ سپریم کورٹ کے حکم کے مطابق ان کے مؤکل پر دہشت گردی کی دفعات لاگو نہیں ہوتیں۔

اے ٹی سی نے ملزم شیرباز ساتکزئی کا کیس متعلقہ عدالت کو بھیجنے کا حکم دیا ہے، جہاں سے ان کا ریمانڈ لیا جائے گا۔

اسی کیس میں، مقتولہ بانو بی بی کی والدہ گل جان کو بھی پولیس نے گرفتار کیا تھا۔

گل جان نے سوشل میڈیا پر ایک ویڈیو پیغام میں قرآن پاک ہاتھ میں اٹھا کر کہا تھا کہ یہ قتل بلوچی روایات کے مطابق ہوا ہے اور یہ جائز ہے۔

عدالت میں سیریس کرائم انویسٹی گیشن ونگ نے گل جان کو پیش کیا اور بتایا کہ وہ اپنے بیان پر قائم ہیں۔ جس کے بعد عدالت نے گرفتار خاتون کو جوڈیشل ریمانڈ پر جیل بھیجنے کا حکم دے دیا۔