کراچی میں ایک اور غیر ملکی کے ساتھ محبت میں دھوکا

کراچی: تنونیشن خاتون سوندا آیاری نے کراچی کی ویمن پولیس اسٹیشن سے پناہ کی درخواست کی ہے، جب کراچی کے علاقے لیاری کے ایک مقامی شخص محمد عامر سے اس کی محبت کی شادی المناک انجام کو پہنچی۔  

سوندا، جو شمالی افریقہ کے ملک ٹیونس کی رہائشی ہے، 28 نومبر 2024 کو کراچی پہنچی تھی۔ اس نے محمد عامر سے سوشل میڈیا پر دوستی کے بعد محبت کی تھی، جو کراچی کے پرانے شہر کے علاقے نیا آباد کھڈا مارکیٹ کا رہائشی تھا۔

 آن لائن دوستی نے جلد ہی رومانوی رشتے کی شکل اختیار کر لی، اور سوندا نے پاکستان کا ویزہ حاصل کرکے عامر سے شادی کے لیے سفر کیا۔  

کراچی ایئرپورٹ پر عامر اور اس کے خاندان نے اسے خوش آمدید کہا، اور اگلے ہی دن دونوں کی چھوٹی سی تقریب میں شادی ہو گئی۔ 6 مارچ کو لیاری کی یونین کونسل بغدادی میں ان کا نکاح رجسٹرڈ ہوا۔  

شادی کے بعد تنازعات اور طلاق

ابتدائی طور پر سوندا کا کہنا ہے کہ وہ خوشگوار زندگی گزار رہی تھی، لیکن گزشتہ کچھ مہینوں میں معمولی اختلافات کی وجہ سے تعلقات میں کشیدگی پیدا ہوئی۔ صورتحال اس حد تک بگڑی کہ عامر نے اسے طلاق دے دی۔  

اب ایک غیرملک میں تنہا اور بے یارومددگار، سوندا اپنے وطن واپس جانا چاہتی ہے۔ تاہم، اس کا 90 دن کا ویزہ 18 فروری کو ختم ہو چکا ہے، اور ویزہ کی تجدید یا سرکاری اجازت کے بغیر وہ ملک چھوڑ نہیں سکتی۔ اس کے علاوہ، وہ مالی مشکلات کا شکار ہے—واپسی کا ٹکٹ خریدنے کے لیے تقریباً 400 ڈالر اور ویزہ تجدید کے لیے 2 لاکھ 25 ہزار روپے درکار ہیں۔  

اس سے قبل، 27 سالہ امریکی شہری کیرنشا میڈیسن گریس، جو جنوبی کیرولینا کی رہائشی تھی، جھنگ کے 29 سالہ نعیم الحق سے سوشل میڈیا پر دو سال دوستی کے بعد پاکستان آئی تھی۔ کیرنشا نے اسلام قبول کر لیا اور اپنا نام کنیز عائشہ رکھ لیا تھا۔