ایران امریکا جوہری مذاکرات کا چوتھا دور ملتوی

ایران اور امریکا کے درمیان ہونے والا ہفتے کو روم میں طے شدہ مذاکرات کا چوتھا دور ملتوی کر دیا گیا۔

بین الاقوامی خبر رساں ادارے کی رپورٹ کے مطابق ایک سینئر ایرانی اہلکار نے کہا ہے کہ ان مذاکرات کی نئی تاریخ کا اعلان امریکا کے رویے پر منحصر ہوگا۔

خبررساں ایجنسی کے مطابق ایرانی اہلکار کا کہنا تھا کہ جوہری مذاکرات کے دوران ایران پر امریکی پابندیاں کسی بھی سفارتی حل میں مددگار نہیں ہوں گی، امریکا کے رویے کی بنیاد پر آئندہ مذاکرات کی تاریخ کا اعلان کیا جائے گا۔

عمان جو اس سے قبل امریکا اور ایران کے درمیان مذاکرات کی میزبانی کر چکا ہے، نے جمعرات کو اعلان کیا کہ 3 مئی کو متوقع مذاکراتی دور کو لاجسٹکل وجوہات کی بنا پر دوبارہ شیڈول کیا جائے گا۔

ایرانی وزارت خارجہ کے ترجمان کے مطابق تہران نتیجہ خیز مذاکرات کے لیے سنجیدگی اور پختہ عزم کے ساتھ امریکا سے بات چیت جاری رکھے گا۔