آپریشن بُنیان مرصوص میں تاریخی کامیابی پر ملک بھر میں 16 مئی کو یوم تشکر منانے کا اعلان

اسلام آباد : حکومت نے معرکہ حق، بُنیان مرصوص میں تاریخی فتح پر پاکستانی عوام اور افواج پاکستان کو خراج تحسین پیش کرنے اور 16 مئی 2025ء کو قومی سطح پر یوم تشکر منانے کا اعلان کیا گیا ہے۔  

یوم تشکر کے حوالے سے دن کا آغاز ملک بھر کی مساجد میں قرآن خوانی اور خصوصی دعاؤں سے ہوگا۔  

وفاقی دارالحکومت میں 31 اور صوبائی دارالحکومتوں میں 21 توپوں کی سلامی دی جائے گی۔  

اس کے علاوہ مزارِ قائد اور مزارِ اقبال پر گارڈز کی تبدیلی کی خصوصی تقریب ہوگی۔  

وفاقی اور صوبائی دارالحکومتوں میں پرچم کشائی کی تقریبات منعقد کی جائیں گی۔   ملک بھر میں یادگار شہداء پر پھول چڑھائے جائیں گے اور دعائیہ تقاریب ہوں گی۔  

آپریشن بنیان مرصوص کے شہداء کے لواحقین سے ملاقاتیں کرکے انہیں خراج عقیدت پیش کیا جائے گا۔  

یوم تشکر کے حوالے سے مرکزی تقریب پاکستان مونومنٹ، اسلام آباد میں منعقد کی جائے گی ، جس میں وزیراعظم پاکستان مہمان خصوصی ہوں گے۔

تقریب میں چیئرمین جوائنٹ چیفس آف اسٹاف کمیٹی، مسلح افواج کے سربراہان اور **مختلف مکاتب فکر کی نمایاں شخصیات بھی شریک ہوں گی۔