اسلام آباد انتظامیہ کا پی ٹی آئی کو احتجاج کی اجازت دینے سے انکار

اسلام آباد انتظامیہ نے پی ٹی آئی کو انتخابات میں دھاندلی کے خلاف احتجاج کی اجازت دینے سے انکار کردیا۔

تفصیلات کے مطابق پاکستان تحریک انصاف کی جانب سے ہفتے کو اسلام آباد کے ایف نائن پارک میں احتجاج کی اجازت کیلیے درخواست دی گئی تھی، جسے ڈپٹی کمشنر نے مسترد کردیا۔

ضلعی انتظامیہ اسلام آباد کی جانب سے درخواست مسترد کرتے ہوئے مؤقف اختیار کیا گیا ہے کہ شہر میں دفعہ 144 کا نفاذ ہے، کسی بھی جماعت کو ریلی یا احتجاج کی اجازت نہیں اور کسی صورت بھی اجازت نہیں دی جاسکتی۔

ضلعی انتظامیہ نے کہا کہ شہری کسی بھی سیاسی اجتماع کا حصہ بننے سے گریز کریں، اسلام آباد پولیس احتجاجی سرگرمی میں شریک افراد کے خلاف کاروائی کرے۔