کراچی کے مختلف علاقوں میں ایک بار پھر زلزلہ

شہر قائد کے مختلف علاقوں میں ایک بار پھر زمین زلزلے سے لرز اٹھی جس کے باعث شہری خوفزدہ ہوگئے۔

تفصیلات کے مطابق کراچی کے علاقے ملیر، شاہ فیصل، گلستان جوہر، سمیت مختلف علاقوں میں زلزلے کے جھٹکے محسوس کیے گئے۔

اس کے علاوہ سپر ہائی وے پر قائم نجی ہاؤسنگ سوسائٹی اور اطراف کے علاقوں میں بھی شہریوں کے زلزلے کے جھٹکے محسوس کیے جو خوف زدہ ہوئے اور کلمہ طیبہ کا ورد کرتے ہوئے گھروں سے باہر نکل آئے۔

زلزلہ پیما مرکز کے مطابق ریکٹر اسکیل پر زلزلے کی شدت 2.3 جبکہ گہرائی 84 کلومیٹر ریکارڈ کی گئی اور اس کا مرکز مشرقی ملیر سے 83 کلومیٹر فاصلے پر تھا۔

واضح رہے کہ چند روز قبل بھی کراچی کے مختلف علاقوں میں 3.2 شدت کا زلزلہ آیا تھا جس کے نتیجے میں کوئی جانی یا مالی نقصان نہیں ہوا تھا۔