کراچی میں خاتون کو ہراساں کرنے والا رکشہ ڈرائیور گرفتار

کراچی: ڈسٹرکٹ ایسٹ پولیس نے ایک خاتون کے ساتھ بدسلوکی اور ہراسانی کے الزام میں رکشہ ڈرائیور کو گرفتار کر لیا۔

 واقعے کی ویڈیو سوشل میڈیا پر وائرل ہونے کے بعد پولیس نے فوری کارروائی کی۔

سہراب گوٹھ پولیس اسٹیشن کے ایس ایچ او ممتاز مروت کے مطابق، متاثرہ خاتون نے بہادری کا مظاہرہ کرتے ہوئے اپنے موبائل فون سے ملزم کی ویڈیو بنائی، جس میں اسے ایک ویران مقام پر خاتون کو ہراساں کرتے دیکھا جا سکتا ہے۔ 

خاتون نے ویڈیو کے ذریعے اعلیٰ حکام سے انصاف کی اپیل بھی کی تھی۔

ویڈیو منظر عام پر آنے کے بعد ڈی آئی جی ایسٹ ڈاکٹر فرخ علی نے فوری نوٹس لیتے ہوئے پولیس کو کارروائی کی ہدایت کی۔ سہراب گوٹھ پولیس نے ملزم محمد عثمان بنگش کو گرفتار کر لیا۔

 پولیس کے مطابق، ملزم کے خلاف ہراسانی، اقدام زنا اور اغوا کی دفعات کے تحت مقدمہ درج کر لیا گیا ہے۔

پولیس حکام کا کہنا ہے کہ ملزم سے تفتیش جاری ہے اور قانون کے مطابق سخت کارروائی کی جائے گی۔ متاثرہ خاتون کی جانب سے بنائی گئی ویڈیو کو ثبوت کے طور پر استعمال کیا جا رہا ہے۔