اسلام آباد میں کچہری کے باہر خودکش دھماکا، 12 شہید، 27 زخمی

اسلام آباد کے جی الیون سیکٹر میں کچہری کے نزدیک خودکش دھماکے کے نتیجے میں 12 افراد شہید اور 27 زخمی ہوگئے۔

اسلام آباد میں منگل کی دوپہر تقریباً ساڑھے بارہ بجے جی الیون سیکٹر کی کچہری کے نزدیک زور دار دھماکا ہوا جس کی آواز دور دور تک سنی گئی۔

پولیس ذرائع کا کہنا ہےکہ موٹر سائیکل پر سوار خودکش حملہ آور پولیس کی گاڑی کے قریب پہنچا اور اس نے خود کو دھماکے سے اڑا لیا۔

دھماکے سے قریب کھڑی گاڑیوں میں آگ لگ گئی جب کہ خودکش حملہ آور کے اعضا اڑ کر کچہری کے اندر جاگرے۔

ذرائع کے مطابق دھماکے میں بھارتی حمایت یافتہ پراکسی افغان طالبان اور فتنہ الخواج کے ملوث ہونے کے شواہد سامنے آئے ہیں۔ دہشت گرد نے کچہری میں گاڑی داخل کرنے کی کوشش کی اور ناکامی پر پولیس کی گاڑی کے قریب خود کو اڑالیا۔

وزیر داخلہ محسن نقوی نے بتایا کہ دھماکا 12 بج کر 17 منٹ پر ہوا۔