دانش کنیریا کی پاکستانی کرکٹ ٹیم پر تنقید، بھارتی کرکٹرز کے گن گانے لگے

لاہور : پاکستان کرکٹ ٹیم اور پی سی بی شدید تنقید کا نشانہ بنانے والے سابق ٹیسٹ لیگ اسپنر دانش کنیریا باز نہ آئے ، انہوں نے کہا کہ ایک محلہ کی ٹیم پاکستان کرکٹ ٹیم سے بہتر ہے۔

سابق کرکٹر کا کہنا تھا کہ پاکستان کرکٹ ٹیم کا معیار اتنا کم ہے کہ ایک محلہ کی ٹیم بھی ان سے بہتر ہے اور یہ سب پی سی بی کی وجہ سے ہے، قومی ٹیم کی خراب کارکردگی پر بورڈ کو مورد الزام ٹھہرایا جانا چاہیے۔

دانش کنیریا نے کہا کہ کپتان کی کرسی اور پی سی بی میں چیئرمین شپ دماغوں کو خراب کرتی ہے، 2017 میں آئی سی سی چیمپئنز ٹرافی میں پاکستان کو فتح دلوانے والے سرفراز احمد کی جگہ بابر اعظم کو قیادت سونپنا پی سی بی کا غلط فیصلہ تھا۔

اس وقت پاکستان تمام فارمیٹس میں اچھی کارکردگی کا مظاہرہ کررہا تھا، موجودہ قیادت دبا ئو کے حالات کو سنبھال نہیں سکتی،مجھے نہیں معلوم کہ سرفراز احمد کی اچھی کپتانی کے باوجود بابر اعظم کو قیادت کی ذمہ داری کیوں سونپی گئی؟

انہوں نے کہا کہ کپتان وہ ہوتا ہے جو دبا کو اپنے کندھوں پر رکھ کرٹیم کو آگے لے کر جاتا ہے، بدقسمتی سے بابر اعظم اورشان مسعود ایسا کرنے میں ناکام رہے ہیں، وہ بیٹنگ میں بھی اپنی زمہ دای انجام نہیں سے دے سکے۔

پاکستان سے موازنہ کرتے ہوئے دانش کنیریا نے کہا کہ بھارتی کرکٹرز ضرورت پڑنے پر مسلسل اپنا کردارادا کرتے ہیں، شبمن گل، رشبھ پنت، روی چندرن اور اشون سمیت سبھی اپنا حصہ ڈالتے ہیں، یہی وجہ ہے کہ بھارت عالمی معیار کی ٹیم ہے، انہوں نے رشبھ پنت کو بھارت کا مستقبل کا کپتان قرار دیا۔