ایرانی صدر کا پاکستان اور سعودی عرب کے معاہدے سے متعلق بڑا انکشافات

ایرانی صدر مسعود پزیشکیان نے اقوام متحدہ کی جنرل اسمبلی میں خطاب کے دوران غزہ پر اسرائیلی حملوں کی مذمت کرتے ہوئے کہا کہ پاکستان اور سعودی عرب کے درمیان ہونے والا دفاعی معاہدہ مسلم ممالک کے لیے مشترکہ سیکیورٹی نظام کی بنیاد رکھ سکتا ہے۔

بین الاقوامی خبر رساں ادارے کے مطابق ایرانی صدر نے کہا کہ اسرائیل نہ صرف غزہ بلکہ خطے کے دیگر ممالک میں بھی جارحیت اور عدم استحکام پھیلا رہا ہے، جو سفارتی کوششوں کے ساتھ کھلی دشمنی کے مترادف ہے۔ انہوں نے قطر کے دارالحکومت دوحہ میں حماس کی قیادت کو نشانہ بنانے والے حملے کو بھی شدید تنقید کا نشانہ بنایا۔

صدر پزیشکیان نے کہا کہ حالیہ برسوں میں ایران کو اسرائیل کی جانب سے شدید نوعیت کے حملوں کا سامنا رہا، جن میں معصوم جانوں سمیت سائنسدان بھی شہید ہوئے۔ ان کا کہنا تھا کہ خطے میں پائیدار امن طاقت کے زور پر نہیں بلکہ باہمی اعتماد، رابطوں اور مشترکہ تعاون سے حاصل کیا جاسکتا ہے۔

انہوں نے مزید کہا کہ اسرائیلی پھیلائے گئے انتشار کا جواب مسلم ممالک کے درمیان قریبی اور مربوط تعاون سے دیا جانا چاہیے۔ اس موقع پر ایرانی صدر نے پاک سعودی دفاعی شراکت کو خوش آئند قرار دیتے ہوئے کہا کہ یہ اقدام نہ صرف سیاسی و دفاعی سطح پر بلکہ مجموعی طور پر مسلم دنیا کے اتحاد کو مضبوط کرے گا۔

امریکی الزامات کو مسترد کرتے ہوئے ایرانی صدر نے واضح کیا کہ ایران نے کبھی جوہری ہتھیار بنانے کی کوشش نہیں کی اور نہ ہی آئندہ اس کا کوئی ارادہ رکھتا ہے۔