سیلاب متاثرین کیلیے باتھ روم، صارفین نے وزیر اعلیٰ مریم نواز کی تصویر کا پوسٹ مارٹم کرڈالا

پنجاب کی وزیر اعلیٰ مریم نواز نے 'ایکس' پر ایک پوسٹ شیئر کی جس میں سیلاب سے متاثرہ خاندانوں کو سہولیات فراہم کرنے کے لیے حکومت کی کوششوں کو اجاگر کیا گیا۔

 انہوں نے بتایا کہ چنیوٹ میں ریلیف کیمپوں پر "جدید پورٹیبل واش رومز" تعمیر کرکے رکھے گئے ہیں۔

 تاہم، انٹرنیٹ صارفین نے فوراً اس بات کی نشاندہی کی کہ ان کی پوسٹ میں استعمال ہونے والی تصویر آن لائن خرید و فروخت کی ویب سائٹ اولیکس (OLX) پر ایک پورٹیبل واش روم کی تصویر سے ملتی جلتی ہے۔

یہ تصویر ایک اسکرین شاٹ بھی تھی، جس پر 2023 کی تاریخ درج تھی۔

'ایکس' صارفین نے قارئین کے لیے سیاق و سباق (readers’ context) شامل کرتے ہوئے واضح کیا کہ وزیر اعلیٰ مریم نواز کی جانب سے شیئر کی گئی تصویر ایک حقیقی ریلیف کیمپ کی بجائے اولیکس سے لی گئی تھی۔ 

ساتھ منسلک لنک سے یہ بھی ظاہر ہوا کہ پورٹیبل واش روم کا اشتہار دو ہفتے قبل اولیکس پر پوسٹ کیا گیا تھا۔

تاہم، وزیر اعلیٰ مریم نواز نے اس سے پہلے وہاڑی میں سیلاب سے متاثرہ علاقوں میں واقعی لگائے گئے پورٹیبل واش رومز کی تصاویر شیئر کی تھیں۔