معروف پاکستانی کلاسیکل گلوکار لاہور میں سپرد خاک

پاکستان کے معروف کلاسیکل گلوکار حسین بخش گلو طویل علالت کے بعد لاہور میں انتقال کرگئے۔

گلوکاراستاد حسین بخش گلو کی عمر 75 سال تھی اور وہ طویل عرصے سے بزرگی سمیت دیگر وجوہات کی وجہ سے بیمار تھے۔

 حسین بخش گلو کلاسیکی موسیقی کے مشہور شام چوراسی گھرانے سے تعلق رکھتے تھے۔ استاد حسین بخش گلو لاہور میں الحمرا اکیڈمی آف پرفارمنگ آرٹس سے وابستہ تھے۔

ایگزیکٹوڈائریکٹر الحمرا طارق محمود چوہدری نے کلاسیکل گائیک استاد حسین بخش گلو کے انتقال پر گہرے دُکھ اور افسوس کا اظہار کرتے ہوئے کہا ہے کہ استاد حسین بخش گلو گائیکی میں ایک چمکتا ستارہ تھے جنہوں نے اپنے فن سے ملک وقوم کا نام روشن کیا۔

بعد ازاں نماز مغرب کے بعد حسین بخش گلو کی نماز جنازہ ادا کی گئی اُس کے بعد انہیں لاہور کے ہی قبرستان میں سپرد خاک کردیا گیا۔

شعبہ فنون لطیفہ و موسیقی کی دنیا سے تعلق رکھنے والوں نے گلوکار حسین بخش گلو کے انتقال کو بڑا نقصان اور سانحہ قرار دیا ہے۔