رانی مکھرجی کو متعارف کرانے والے معروف مسلمان پروڈیوسر اچانک انتقال کر گئے

رانی مکھرجی اور تمنا بھاٹیا جیسی اداکاراوں کو بالی ووڈ میں متعارف کروانے والے معروف پروڈیوسر سلیم اختر 82 برس کی عمر میں انتقال کر گئے۔

بھارتی میڈیا رپورٹ کے مطابق ممبئی کے کوکیلا بین دھیرو بھائی امبانی اسپتال نے فلم پروڈیوسر سلیم اختر کی موت کی تصدیق کی ہے۔

 تاہم ان کے اچانک موت کی وجہ معلوم نہیں ہو سکی۔ان کے پسماندگان میں ان کی اہلیہ شمع اختر اور بیٹا صمد اختر شامل ہیں۔

فلم ساز نے کئی مشہور فلمیں بھی پروڈیوس کیں جن میں 1983ء میں ریلیز ہونے والی فلم قیامت، 1993ء کی کلاسک فلم پھول اور انگار، 1995ء کی ایکشن تھرلر فلم بازی، 1997ء کی ڈرامہ فلم راجہ کی آئے گی بارات، 2000ء کی مشہور فلم بادل سمیت کئی دیگر فلمیں شامل ہیں۔

پروڈیوسر کی اچانک موت پر انڈسٹری سوگوار ہے اور سب کو صدمہ پہنچا ہے۔