نادیہ جمیل کا ہراساں کرنے والے ہدایت کار کو بے نقاب کرنے کا اعلان

پاکستانی ڈرامہ انڈسٹری کی معروف اداکارہ نادیہ جمیل نے جنسی ہراساں کرنے والے ہدایت کار کو جلد بے نقاب کرنے کا اعلان کیا ہے۔

اداکارہ نے اس بات کا اعلان ایک یوٹیوب پوڈ کاسٹ میں گفتگو کرتے ہوئے کیا اور کہا کہ وہ فوری نہیں البتہ کچھ عرصے کے بعد ہدایت کار کو بے نقاب ضرور کریں گی کیونکہ انہیں خدشہ ہے کہ ہدایت کار اُن کے بچوں کو نقصان نہ پہنچا دے۔

نادیہ جمیل کا کہنا تھا وہ اپنے آپ کو مشکل میں ڈالنے سے بچتی ہیں اور ایسے لوگوں سے دور رہتی ہیں جو مشکل پیدا کرسکتے ہیں۔ اداکارہ کے مطابق جب سے انہیں ہدایت کار نے ہراساں کیا انہوں نے اس ہدایت کار کے ساتھ کام نہیں کیا اور وہ  خود کو اب بہت کامیاب سمجھتی ہیں۔ 

نادیہ کے بقول انہیں نعمان اعجاز نے ایک ڈرامے کی پیش کش کی تاہم جب انہیں معلوم ہوا کہ ہدایت کار وہی ہراساں کرنے والا شخص ہے تو انہوں نے سیریل میں کام کرنے سے انکار کردیا۔