پاکستان میں لوگوں کی اوسط عمر میں دو سال کا اضافہ ہوگیا

پاکستان کے اقتصادی سروے 2023-2024 کے مطابق ملک میں متوقع عمر 2015 میں 65.7 سال سے بڑھ کر 2022 میں 67.3 سال ہو گئی ہے۔

اوسط عمر بڑھنے کی وجہ انفراسٹرکچر اور احتیاطی ادویات  سمیت سرمایہ کاری اور صحت کی دیکھ بھال کیلیے کی جانے والی کوششیں ہیں۔

سروے رپورٹ کے مطابق حکومتی اقدامات کی ایک وسیع رینج، جیسے ہیپاٹائٹس کے خاتمے کے لیے پروگرام، ذیابیطس پر قابو پانے اور حفاظتی ٹیکوں کے بڑھتے ہوئے پروگراموں نے متوقع عمر میں اضافے میں اہم کردار ادا کیا۔

منگل کو وزیر خزانہ محمد اورنگزیب کی طرف سے پیش کیے گئے اقتصادی سروے میں کہا گیا ہے کہ "تمام اعشاریوں میں نمایاں بہتری آئی ہے، جو پاکستان کے صحت کے شعبے کے بہتر مجموعی پروفائل کی نشاندہی کرتی ہے۔" اضافے کے باوجود، موجودہ متوقع عمر اب بھی جنوبی ایشیائی علاقائی اوسط 71.6 سال سے پیچھے ہے۔

سروے میں 2015 اور 2022 کے درمیان اعشاریوں کا موازنہ دکھایا گیا، جس سے ظاہر ہوتا ہے کہ بچوں کے اسٹنٹنگ میں نمایاں پیش رفت 41 فیصد سے کم ہو کر 34 فیصد رہ گئی۔

ڈیفتھیریا پرٹیوسس ٹیٹنس (ڈی پی ٹی) کے حفاظتی ٹیکے 2015 میں 72 فیصد بچوں سے بڑھ کر 2022 میں 12-23 ماہ کی عمر کے 85 فیصد بچوں تک پہنچ گئے۔ رپورٹ میں اعتراف کیا گیا کہ پاکستان صحت کی دیکھ بھال پر اپنی جی ڈی پی کا صرف 1 فیصد خرچ کر رہا ہے جو کہ جنوبی ایشیا کی اوسط 3.1 فیصد سے کم ہے۔

مزید یہ کہ 2021 میں بچوں کی اموات کی شرح 30.8 فی 1000 زندہ پیدائش تھی، جب کہ پانچ سال سے کم عمر بچوں کی شرح اموات 37.1 فی 1000 رہی جو کہ جنوبی ایشیا کے ممالک سے کم تھی۔ 2023 میں، ملک بھر میں طبی سہولیات کو بڑھانے کے لیے، پاکستان نے 299,113 ڈاکٹروں، 36,032 دندان سازوں، 127,855 نرسوں، 46,110 دائیوں اور 24,022 لیڈی ہیلتھ ورکرز کو رجسٹر کیا۔

تاہم، پاکستان کے ہیلتھ کیئر سیکٹر کے مجموعی پروفائل میں نمایاں بہتری دیکھی گئی۔