عمران خان کا معافی کا اعلان، ملک کیلیے درگزر کا راستہ اپنانے کا مشورہ

پاکستان تحریک انصاف کے بانی چیئرمین عمران خان نے کہا ہے کہ ہم کسی سے کوئی سیاسی انتقام نہیں لیں گے، پاکستان کو آگے لے جانے کیلیے معافی اور درگزر کی طرف جانا ہوگا۔

تفصیلات کے مطابق اڈیالہ جیل میں پاکستان تحریک انصاف کے تین نو منتخب اراکین قومی اسمبلی نے بانی چیئرمین سے ملاقات کی۔ ملاقات کرنے والوں میں سابق وفاقی وزیر علی محمد خان،عامر ڈوگر اور لطیف کھوسہ شامل تھے۔

ملاقات شام ساڑھے سات بجے کانفرنس روم میں شروع ہوئی اور تقریبا ایک گھنٹے تک جاری رہے۔ بعد ازاں تینوں اراکین قومی اسمبلی جیل سے روانہ ہوگئے اور میڈیا سے کوئی بات نہیں کی۔

علی محمد خان نے سماجی رابطے کی سائٹ ایکس پر عمران خان سے ملاقات کے حوالے سے ایک ٹویٹ کیا اور لکھا کہ بانی چیئرمین نے کہا ہے کہ ’ہم کوئی سیاسی انتقام نہیں لیں گے بلکہ ملک و قوم کی ترقی کی خاطر آگے جائیں گے‘۔

ابھی اڈیالہ @ImranKhanPTI صاحب سے ملاقات ہوئی ہے۔ ملاقات میں سردار لطیف کھوسہ صاحب اور محمد عامر ڈوگر صاحب بھی موجود تھے۔ ماشاءاللٰہ صحت اچھی تھی اور ہشاش بشاش لگ رہے تھے۔ تقریبًا آدھا گھنٹہ ملاقات رہی۔ اپنے لیڈر سے اتنے عرصہ بعد ملا بہت اچھا لگا۔ مردان کی تاریخی جیت کا سن کر…

— Ali Muhammad Khan (@Ali_MuhammadPTI) February 16, 2024

انہوں نے بتایا کہ عمران خان نے نیلسن منڈیلا کے سچائی اور اصلاحی کمیشن کا حوالہ دیتے ہوئے کہا کہ ’ملک کو آگے لے جانے کیلیے ہمیں سچ، معافی اور درگزر کی طرف جانا ہوگا‘۔