عید سے قبل فوجی عدالتوں سے 20 افراد کی رہائی اور دیگر کو رعایت ملنے کا امکان

سپریم کورٹ آف پاکستان نے سانحہ نو مئی کے ملزمان سے متعلق کیسز کے فوجی عدالتوں کو محفوظ شدہ فیصلے سنانے کی مشروط اجازت دے دی۔

سپریم کورٹ میں فوجی عدالتوں کیخلاف فیصلہ پر انٹراکورٹ اپیلوں پر سماعت ہوئی۔ جس میں اٹارنی جنرل منصور عثمان نے بتایا کہ عید سے قبل 20 افراد کی رہائی ممکن ہے جبکہ بریت یا کم سزا والوں کو رعایت دی جائے گی۔

انہوں نے بتایا کہ جن ملزمان کو ایک سال کی سزا دی گئی ہے انہیں رعایت دینے کا فیصلہ کیا گیا ہے، اس وقت 105 ملزمان فوج کی تحویل میں ہیں، جنہیں رہائی کے لیے تین مراحل سے گزرنا ہوگا۔

انور منصور کے مطابق پہلے مرحلے میں محفوظ فیصلہ سنایا جائے گا، دوسرے میں توثیق ہوگی جبکہ تیسرے میں آرمی چیف کی جانب سے ملزمان کو رعایت دی جائے گی۔ انہوں نے سپریم کورٹ سے فوجی عدالتوں کو محفوظ شدہ فیصلے سنانے کی اجازت دینے کی استدعا کی۔ 

جسٹس امین الدین خان نے کہا کہ اگر اجازت دی بھی تو اپیلوں کے حتمی فیصلے سے مشروط ہوگی۔