بلدیہ فیکٹری کیس، ایم کیو ایم کارکنان کی بریت کو سندھ حکومت نے چیلنج کر دیا

سندھ حکومت نے سانحہ بلدیہ کیس ملزموں کی رہائی سے متعلق اپیلوں کے فیصلے کیخلاف نظر ثانی کی درخواست دائر کردی۔ 

نظر ثانی کی درخواست پراسیکیوٹر جنرل سندھ شبیر شاہ نے دائر کی۔

سندھ حکومت نے سپریم کورٹ کے فیصلے کے خلاف نظرثانی درخواست میں موقف اختیار کیا ہے کہ یہ فیصلہ چشم دید گواہوں، طبی رپورٹوں اور کیمیکل ماہرین کے شواہد کو نظر انداز کرنے کی خامی کا شکار ہے۔

 درخواست میں آئینی سوال اٹھایا گیا ہے کہ کیا قانون کے متصادم فیصلے پر آئین کا آرٹیکل 188 لاگو نہیں ہوتا؟ مزید برآں، قانونِ شہادت کے آرٹیکل 17 اور 4 کے اطلاق پر اعتراض کرتے ہوئے یہ نکتہ بھی اٹھایا گیا۔

 درخواست گزار کا کہنا ہے کہ انسدادِ دہشت گردی ایکٹ کے تحت ملزمان کی بریت پر مقتولین کے ورثاء کو اعتراض کا پورا حق ہے، لہذا عدالت اپنے فیصلے پر نظرثانی کرے۔

یاد رہے سپریم کورٹ نے ایم کیو ایم کے کارکنان رحمان بھولا اور زبیر چریا کو الزامات سے بری کرتے ہوئے رہا کرنے کا حکم دیا تھا۔