بشری بی بی کا نجی اسپتال میں معائنہ، ڈاکٹرز نے بیماری کو محض گیسٹرو قرار دے دیا

سابق خاتون اول بشریٰ بی بی کا عدالتی حکم پر چیک اپ مکمل کرلیا گیا اور ڈاکٹرز نے تمام رپورٹس کلیئر قرار دیتے ہوئے بیماری کو معمولی گیسٹرو قرار دے دیا۔

ذرائع کے مطابق بشریٰ بی بی ٹیسٹ کیلئے 6 گھنٹے اسلام آباد کے نجی اسپتال میں رہیں جہاں ان کی انڈوسکوپی سمیت متعدد ٹیسٹ کیے گئے۔ اس موقع پر عمران خان کے ذاتی معالج بھی موجود تھے۔

بشری بی بی نے بلڈ ٹیسٹ کروانے سے انکار کیا اور نمونہ بھی نہیں دیا تاہم ان کی اینڈو اسکوپی، الٹرا ساؤنڈ ایکو اور ایک سی جی کی گئی۔

اسپتال ذرائع کا کہنا ہے کہ بشری بی بی کی تمام رپورٹس کلیئر آئی ہیں اور ڈاکٹر نے انکی صحت کو اطمینان بخش قرار دیتے ہوئے طبی مسئلے کو گیسٹرو کی معمولی وجہ قرار دے دیا۔

دوسری جانب پنجاب حکومت کی ترجمان اور لیگی رہنما نے بھی کہا ہے کہ بشری بی بی کی صحت پر واویلا کرنے والے ایک بار پھر ناکام ہوئے ہیں کیونکہ رپورٹس میں انہیں کوئی بیماری یا مسئلے کی تشخیص نہیں ہوئی۔