بشری بی بی کے بیڈ روم اور واش روم میں سی سی ٹی وی کیمرے لگائے جانے کا انکشاف

پاکستان تحریک انصاف (پی ٹی آئی) نے منگل کو دعویٰ کیا ہے کہ حکام نے بنی گالہ سب جیل میں پارٹی کے بانی عمران خان کی اہلیہ بشریٰ بی بی کے واش روم اور بیڈ روم میں سی سی ٹی وی کیمرے نصب کر دیے ہیں۔

 سابق خاتون اول مذکورہ جیل میں توشہ خانہ اور عدت کے مقدمات میں قید کی سزا کاٹ رہی ہیں۔

 یہ دعویٰ سابق وزیراعظم عمران خان کے وکیل نعیم حیدر پنجوتھا نے اسلام آباد میں میڈیا سے گفتگو کرتے ہوئے کیا۔

 انہوں نے عدالت پر زور دیا کہ وہ معاملے کی تحقیقات کے لیے ایک کمیشن بنائے، جو مبینہ طور پر کیمرے لگانے میں ملوث حکام کے خلاف کارروائی کرے۔

 پنجوتھا نے کہا کہ بشریٰ بی بی کے واش روم اور بیڈ روم میں کیمرے لگا کر ان کی رازداری پر حملہ کیا گیا۔

 دوسری جانب بشریٰ بی بی نے سب جیل سے سی سی ٹی وی کیمرے ہٹانے کے لیے اسلام آباد ہائی کورٹ (آئی ایچ سی) میں درخواست دائر کردی۔

 درخواست میں، انہوں نے عدالت سے یہ بھی استدعا کی کہ شوکت خانم میموریل کینسر ہسپتال (ایس کے ایم سی ایچ) کے ڈاکٹروں کو ان کے کھانے میں زہر کے شبے کی وجہ سے طبی معائنہ کرنے کی اجازت دی جائے۔

 اس سے قبل بشریٰ بی بی نے دعویٰ کیا تھا کہ شب معراج کے دن کسی نے ان کے کھانے میں ٹوائلٹ کلینر کے تین قطرے ملائے تھے۔

 بعد ازاں سابق وزیراعظم نے اڈیالہ جیل میں 190 ملین پاؤنڈ کے تصفیہ کیس کی سماعت کے دوران یہ بھی الزام لگایا کہ بشریٰ بی بی کو بنی گالہ میں زہر دیا گیا۔

 تاہم ایس کے ایم سی ایچ کے چیف میڈیکل آفیسر ڈاکٹر عاصم یوسف نے ان الزامات کی تردید کرتے ہوئے کہا کہ بشریٰ بی بی کے طبی معائنے میں زہر کا کوئی ثبوت نہیں ملا۔