افغان مہاجرین کے معاملے پر عمران خان کی منظوری کے بغیر حکومتی پالیسی کا ساتھ نہیں دے سکتا، وزیر اعلی سہیل آفریدی

خیبر پختونخوا کے وزیرِاعلیٰ سہیل آفریدی نے وفاقی حکومت کے ساتھ افغان مہاجرین اور دیگر اہم امور پر ہونے والے اجلاس میں شرکت سے انکار کر دیا۔

یہ مؤقف اختیار کرتے ہوئے کہ وہ اپنے قائد عمران خان سے مشاورت کے بغیر کوئی فیصلہ نہیں کر سکتے۔

سوشل میڈیا پلیٹ فارم ایکس (X) پر بیان جاری کرتے ہوئے سہیل آفریدی نے کہا کہ وہ اس اجلاس میں اس لیے شامل نہیں ہو رہے کیونکہ وہ عمران خان سے رہنمائی حاصل نہیں کر سکے۔ ان کا کہنا تھا کہ انہیں جو منصب ملا ہے وہ ''عمران خان کے نام پر عوام کے اعتماد'' کی بدولت ہے۔

انہوں نے لکھا کہ ''جب تک میں عمران خان سے ملاقات کر کے پالیسی ہدایات نہیں لیتا، ایسے کسی اجلاس میں شرکت عوامی مینڈیٹ کی توہین ہوگی۔''

وزیرِاعلیٰ نے وفاقی حکومت سے مطالبہ کیا کہ انہیں اپنے قید رہنما سے باقاعدہ ملاقات کی اجازت دی جائے، کیونکہ عمران خان ہی ''خیبر پختونخوا کے عوامی مینڈیٹ کے اصل امین'' ہیں۔

سہیل آفریدی نے مزید بتایا کہ وہ عدالت سے رجوع کرنے کا ارادہ رکھتے ہیں تاکہ عمران خان سے جیل میں ملاقات کی اجازت حاصل کی جا سکے۔

ذرائع کے مطابق جمعرات کے روز وزیرِاعلیٰ آفریدی اڈیالہ جیل گئے تھے مگر دو گھنٹے انتظار کے باوجود انہیں عمران خان سے ملنے نہیں دیا گیا۔ انہوں نے کہا کہ اپنی صوبائی کابینہ کا حتمی فیصلہ بھی عمران خان سے مشاورت کے بعد ہی کریں گے۔