کراچی: امریکی صدر ٹرمپ کیخلاف اندارج مقدمہ کی درخواست پر دلائل طلب

کراچی کی ایک ایڈیشنل سیشن عدالت نے ایران کی جوہری تنصیبات پر حملوں کے بعد بین الاقوامی قوانین اور جنیوا کنونشن کی مبینہ خلاف ورزیوں پر امریکی صدر ڈونلڈ ٹرمپ کے خلاف فوجداری مقدمہ کے اندراج کی درخواست پر دائرہ اختیار اور قانونی اختیار سے متعلق دلائل طلب کر لیے ہیں۔

کراچی سٹی کورٹ میں ڈسٹرکٹ اینڈ سیشن کورٹ میں درخواست ایڈووکیٹ جمشید علی خواجہ نے جمع کرائی جس میں ایڈیشنل آئی جی کراچی، ایس ایس پی ساؤتھ اور ڈاکس تھانے کے ایس ایچ او کو مدعی نامزد کیا گیا۔درخواست گزار نے ڈونلڈ ٹرمپ کو ملزم نامزد کیا ہے۔

درخواست گزار کا موقف ہے کہ ٹرمپ نے مجرمانہ سرگرمیوں اور ایران کی جوہری تنصیبات کو نشانہ بنا کر بین الاقوامی اور انسانی قانون کی خلاف ورزیوں کے ذریعے عالمی امن کو خطرے میں ڈالا۔

انہوں نے یہ بھی الزام لگایا کہ اس کے نتیجے میں لاکھوں مسلمانوں اور ہزاروں وکلا کو ذہنی، جسمانی اور مالی نقصان پہنچا ہے۔

عدالت کو بتایا گیا کہ کراچی پولیس کے اعلی حکام کو متعدد تحریری شکایات جمع کروائی گئیں، لیکن کوئی ایف آئی آر درج نہیں ہوئی اور نہ ہی کوئی بیان ریکارڈ کیا گیا۔

درخواست میں عدالت سے استدعا کی گئی ہے کہ وہ پولیس کو درخواست گزار کا بیان ریکارڈ کرنے اور فوجداری ضابطہ اخلاق (سی آر پی سی) کی دفعہ 154 کے تحت ایف آئی آر درج کرنے کی ہدایت کرے۔

ڈسٹرکٹ کورٹ نے معاملہ سماعت کے لیے ایڈیشنل سیشن کورٹ کو بھیج دیا۔

ایڈیشنل سیشن جج نے ابتدائی جائزہ لینے کے بعد درخواست گزار کے وکیل سے درخواست کے دائرہ اختیار اور قابل قبولیت پر دلائل پیش کرنے کو کہا ہے۔ سماعت جولائی تک ملتوی کر دی گئی۔