کراچی میں کونسا پاسپورٹ آفس 24 گھنٹے کھلا رہے گا؟ جانیے

وفاقی وزیرداخلہ محسن نقوی نے ملک بھر میں پاسپورٹ بنوانے کے حوالے سے سامنے آنے والے مسائل اور عوامی شکایات کے بعد لاہور اور کراچی کے دو میگا پاسپورٹ آفسسز چوبیس گھنٹے کھلے رکھنے کی ہدایت کی ہے۔

پاسپورٹ دفاتر چوبیس گھنٹے کھولنے کا مقصد کام کے بوجھ کو کم کرنا اور شہریوں کو بروقت پاسپورٹ کی فراہمی یقینی بنانا ہے۔ واضح رہے کہ گزشتہ کئی ماہ سے ارجنٹ پاسپورٹ کیلیے اپلائی کرنے والے صارفین بھی چار چار ماہ تک اپنے پاسپورٹ کے منتظر رہی ہیں۔

افرادی قوت کی کمی سمیت دیگر عوامل کے باعث بیک لاک کافی بڑھ گیا تھا جس کی وجہ سے شہریوں کو پریشانی کا سامنا تھا اس پر محسن نقوی نے نوٹس لیتے ہوئے لاہور اور کراچی میں دو پاسپورٹ دفاتر چوبیس گھنٹے عوام کیلیے کھولنے کا حکم دیا۔

کراچی میں عوامی مرکزپاسپورٹ آفس منگل سے 24گھنٹوں کے لیے فعال رہےگا،تین مختلف شفٹوں کام کرنے کے لیےعملہ تعینات کیا جائےگا۔

وفاقی وزیرداخلہ محسن نقوی کی جانب سے کراچی میں پاسپورٹ آفس  24گھنٹے فعال رکھنے کے تناظر میں پاسپورٹ آفس عوامی مرکزمیں تمام تیاریاں مکمل کرلی گئیں ہیں۔ منگل سے عوامی مرکز پاسپورٹ آفس پورے ہفتے 24گھنٹے کام کرےگا، جس میں تین مختلف شفٹوں میں عملے کی تعیناتی ہوگی اور عوام کو سہولیات فراہم کی جائے گی۔

ذرائع کے مطابق نادرا دفاتر کی طرزپرپاسپورٹ آفس کو 24گھنٹے فعال رکھنے کے بعدشہریوں کوبہترسہولیات میسرآئیں گی۔