کوئٹہ، بی این پی کے جلسے کے اختتام پر دھماکا، 13 جاں بحق اور 29 زخمی

کوئٹہ میں شاہوانی اسٹیڈیم روڈ پر بلوچستان نیشنل پارٹی کے تعزیتی جلسے کے بعد دھماکا ہوا جس میں اب تک 13 افراد جاں بحق ہوگئے ہیں۔

تفصیلات کے مطابق بلوچستان نیشنل پارٹی کی جانب سے سردار عطا اللہ مینگل کی برسی کی مناسبت سے منعقدہ تعزیتی جلسے کے اختتام پر پنڈال کے قریب دھماکا ہوا۔

ذرائع کے مطابق سردار اختر مینگل کو نشانہ بنانے کی کوشش کی گئی تاہم خوش قسمتی سے وہ محفوظ رہے۔

بلوچستان نیشنل پارٹی کے ترجمان ساجد ترین نے دعویٰ کیا ہے کہ ہمارے 13 کارکنان دھماکے میں جاں بحق جبکہ 29 زخمی ہوئے جن میں سے کئی کی حالت تشویشناک ہے۔

واقعے کے بعد پولیس اور فورسز کی بھاری نفری نے جائے وقوعہ کو گھیرے میں لے لیا جبکہ ریسکیو رضاکاروں نے لاشوں اور زخمیوں کو سول اسپتال کوئٹہ منتقل کردیا۔

دوسری جانب وزیراعلیٰ بلوچستان نے دھماکے کی شدید الفاظ میں مذمت کرتے ہوئے تحقیقات کیلیے چار رکنی اعلیٰ سطح کی کمیٹی تشکیل دے دی۔

اپنے مذمتی بیان میں انہوں نے کہاکہ دہشت گرد عناصر معصوم شہریوں کے خون سے کھیل رہے ہیں، اُن کے ناپاک عزائم کو ہرصورت ناکام بنائیں گے۔

سرفراز بگٹی نے سیکیورٹی فورسز کو ہدایت کی کہ واقعے میں ملوث ذمہ داروں کو فوری طور پر گرفتار کیا جائے۔